د ۲۰۲۳کال د نومبر له لومړۍ نېټې څخه تر اوسه پورې پاکستان څلور لکه او ۶۰زره ۸۶۳ افغانان په غیر قانوني توګه د اوسېدو په بهانه له دې هېواده اېستلي دي.
د پاکستاني رسنیو د راپورونو له مخې، یوازې تېره ورځ ۶۹۳ افغان کډوال بېرته خپل هېواد ته ستانه شوي دي.
راپور زیاتوي، چې خپل هېواد ته د افغانانو او نورو بې اسنادو اوسېدونکو د اېستلو لړۍ دوام لري. پاکستان چې له تېرو څلورو لسیزو راهیسې د زرګونو افغان کډوالو کوربه هېواد دی، په دې وروستیو کې پرېکړه کړې چې ټول غیر قانوني کډوال به وباسي.
له دې سره په دغو اېستل شویو کډوالو کې هغه کورنۍ هم شته چې له کلونو راهیسې د پاکستان په بېلابېلو ښارونو کې اوسېدل او د دې هېواد شناختي کارټونه یې هم درلودل.