د هرات ولایت د انجیل ولسوالۍ په میرقنات، خواجه شهاب، علی منصور، کالار او هوادشت کلیو کې ۱۴۰ نور تازه رغول شوي کورونه زلزله ځپلو ته سپارل شوي دي.
هرات زلزله ځپلو ته د رسیدګۍ کمیسيون وياند احمدالله متقي وايي، چې یاد کورونو د څه باندې ٢٢ ميليونه افغانيو په لګښت د يوې مياشتې او لسو ورځو په موده کې رغول شوي دي.
متقي زیاته کړې، چې اوس هم په زلزله ځپلو سيمو کې د کورونو د جوړولو کار روان دى او په راتلونکي کې به د دغه ولايت په ګلران ولسوالۍ کې هم د زيانمنو شويو خلکو لپاره د کورونو پر جوړولو کار وکړي.