کابل د امريکا د بهرنيو چارو وزير وايي چې د افغانستان او سيمې پهاړه نوې تګلاره به د سياسي او امنيتي حالاتو تر بشپړې ارزونې وروسته اعلان شي.
د امريکا د بهرنيو چارو وزارت له خوا په يوه خپره شوې خبرپاڼه کې راغلي چې رېکس ټېلرسن اسيا ته په خپل سفر کې له خبريالانو سره په خبرو کې ويلي چې د افغانستان په اړه د تګلارې جوړوونکې ډله د ټولې سيمې په اړه فکر کوي.
بلخوا ځينو امريکايي رسنيو خبر ورکړى چې دغه ډله  د سپينې ماڼۍ او کانګرس ترمنځ د تاوتريخوالي له امله له ستونزو سره مخ شوې ده.
د امريکا د بهرنيو چارو وزير ويلي: ((موږ پر څو موضوعاتو فکر کوو، په دې اړه  تر اوسه د ملي امنيت شورا په درېیو غونډو کې خبرې هم شوې.))
ټېلرسن ويلي، ولسمشر ټرمپ په دې اړه څو  مهمې پوښتنې کړې چې بايد يې کړې واى؛ ځکه تر دې مخکې نورو مشرانو دا ډول پوښتنې نه وې کړې.
د هغه په وينا: ((ولسمشر چې د افغانستان او سيمې د تګلارې په اړه کومې پوښتنې کړې، موږ غواړو چې بشپړ او ښه ځوابونه يې ولرو چې د افغانستان او پاکستان راتلونکى بايد څه ډول وي.))
د امريکا  د بهرنيو چارو وزير، د مرستيال ولسمشر پينس په ګډون د ولسمشر ټرمپ د حکومت ډېرى مهم چارواکي د يادې تګلارې جوړولو په پروسه کې شامل دي.
نوموړي د افغانستان په اړه د تګلارې اعلانولو د ځنډ په اړه د يوې پوښتنې په ځواب کې ويلي چې دا تګلاره به د حالاتو له بشپړې اروزنې او بيا کتنې وروسته اعلان شي.
د هغه په وينا، دوى سياسي، ډيپلوماتيک او نظامي اړخونه څېړي او له هغه وروسته به وروستۍ پرېکړه وکړي.
د يادونې ده، د افغانستان لپاره د امريکا ځانګړې استازې  دوه ورځې مخکې او د امريکا د استخباراتي ادارې (سي اى اې) مشر تېره اوونۍ کابل ته سفر درلود او له افغان مشرانو سره يې پر يادې تګلارې تفصيلي خبرې کړې دي.