کابل د کابل پوليس وايي چې کابل ښار کې يې د يوې کورنۍ د پنځو ماشومانو د وژنې په تړاو دوه کسان نيولي دي.
د کابل پوليسو د ١٠١اسمايي زون له جنايي جرمونو سره د مبارزې مشر مل پاسوال محمد سالم الماس، په خپله فېسبوک پاڼه کې ليکلي چې ياد دوه کسان تېره شپه نيول شوي دي.
د نوموړى په خبره، ياد پنځه ماشومان له لسو تر ١٤ کلونو پورې عمرونه درلودل چې د زمري په اتمه د کابل ښار لسمې امنيتي حوزې اړوند د سليم کاروان ساحه کې وژل شوي وو.
د نوموړي په خبره، نيول شوو کسانو پر خپل جرم اعتراف کړى، خو هويت يې نه دى په ډاګه شوى.
دا په داسې حال کې ده چې چارواکو پخوا رسنیو ته ويلي وو چې د پوليسو د  لومړنيو څېړنو له مخې، دغه ماشومان د برېښنا د نيولو په سبب وژل شوي دي.